Main foodie hoon, par weight bhi track karta hoon. Roz subah weighing scale par mera naseeb tay hota hai — kabhi proud, kabhi guilty. Life mein discipline poora hai, sab kuch tick-marked. But I will be honest, indulgence se door rehna mere bas ki baat nahi hai.
Kal raat mood bana, dimaag ne kaha, “Aaj ek treat toh banti hai!” Aur kadam seedhe chal pade chhole bhature se milne ke liye. Acha hai koi appointment nahi leni padhti. Bhature ko dekh mujhe pukar film ka gaana yaad aata hai — “samandar mein naha ke aur bhi namkeen ho gayi ho.” Bas mera bhatura tel mein naha kar aata hai.
Aur chhole ka kya hi bolun. Dono ke ishaare bhi kuch aise the ki “pyaar jhukta nahi, jhukta nahi” wala feel aa gaya.
Khair baat wahin nahi ruki, agar dessert mein ek gulkand falooda na khaun aisi na-insafi main kar nahi sakta. Plate khaali, dil khush, aur Instagram pe photo bhi chali gayi.
Sote waqt dimaag mein kal subah ka penalty card dikh raha tha.
Par aaj subah jab scale pe khada hua, toh surprise! The number was exactly the same. Ek gram bhi upar nahi. Pehle laga scale kharab hai, ya phir fitness app ne koi glitch dikhaya hai.
Par phir ek ajeeb si khushi hui. Tab samajh aaya — chhole bhature aur falooda bhi bewafai kar sakte hain. Aur unki bewafai jaisi sweet dhoka kahin nahi milta 😉
